माझा महाराष्ट्र
अहमदनगर जिल्ह्यातील अकोले तालुक्यातील भंडारदरा धरणाच्या पाणलोटात कोसळत असलेल्या पावसामुळे भंडारदरा धरण निम्मे भरले आहे. ओढ्या- नाल्यांमधून वाहणारे पाणी भंडारदरा धरणाला मोठ्या प्रमाणात येऊन मिळत असल्याने धरणामध्ये नवीन पाण्याची मोठ्या प्रमाणात आवक होत आहे.
गेल्या काही दिवसांपासून भंडारदरा पाणलोटात मुसळधार पाऊस सुरू आहे. या पावसामुळे आदिवासी बांधवांचे जनजीवन पूर्ण विस्कळीत झाले आहे; मात्र पर्यटकांना भंडारदऱ्याचा पावसाळा म्हणजे आनंद द्विगुणीत करणारा ठरला आहे. शनिवार व रविवार असे सुट्टीचे औचित्य साधत अनेक पर्यटकांनी भंडारदऱ्याला भेट देत निसर्ग पर्यटन उपभोगले. भंडारदरा परिसरात सतत सुरू असलेल्या पावसामुळे परिसरातील धबधबे खुलेआम कोसळत आहेत. कोलटेंभे येथील नेकलेस फॉल, नान्ही फॉल, वसुंधरा धबधबा, बाहुबही धबधबा, साम्रदचा कोकणकड्यावरील रिव्हस धबधबा, तर पांजरे येथील पांजरा फॉल पाहण्यासाठी पर्यटकांनी एकच गर्दी केली आहे.
गत २४ तासात भंडारदरा येथे ९९ मीमी पावसाची नोंद झाली. रतनवाडी १३० मीमी, घाटघर १५० मीमी, पांजरे १२३ मीमी तर वाकी येथे ६६ मीमी पावसाची नोंद झाली आहे, तर भंडारदरा धरणाचा पाणीसाठा ५२.७८ % झाला आहे. भंडारदरा धरणात आत्ताच्या परिस्थितीत ५८२६ दशलक्ष घनफूट पाणी जमा असून सकाळी सहा वाजेपर्यंत भंडारदरा धरणात १८५ दशलक्ष घनफूट नविन पाण्याची आवक झाली होती. वीजनिर्माण केंद्रातून ८३७ क्युसेकने पाणी प्रवरा नदीत वाहत आहे.
If you have any doubt, then contact me